IN RICORDO DI FELICIA, MADRE DI PEPPINO IMPASTATO

Felicia Impastato

A MATRI DI PIPPINU : FELICIA IMPASTATO

(di Umberto Santino - Poesie per Peppino e per Felicia)

" Chistu unn’ è me figghiu.
Chisti un su li so manu
chista unn’ è la so facci.
Sti quattro pizzudda di carni
un li fici iu.

Me fighhiu era la vuci
chi gridava’ nta chiazza
eru lu rasolu ammulatu
di lo so paroli
era la rabbia
era l’ amuri
chi vulia nasciri
chi vulia crisciri.

Chistu era me figghiu
quannu era vivu,
quannu luttava cu tutti:
mafiusi, fascisti,
omini di panza
ca un vannu mancu un suordu
patri senza figghi
lupi senza pietà.

Parru cu iddu vivu
un sacciu parrari
cu li morti.
L’ aspettu iornu e notti,
ora si grapi la porta
trasi, m’abbrazza,
lu chiamu, è nna so stanza
chi studìa, ora nesci,
ora torna, la facci
niura come la notti,
ma si ridi è lu suli
chi spunta pi la prima vota,
lu suli picciriddu.

Chistu unn’ è me figghiu.
Stu tabbutu chinu
di pizzudda di carni
unn’ è di Pippinu.

Cca dintra ci sunnu
tutti li figghi
chi un puottiru nasciri
di n’ autra Sicilia "